සුමියා.

කවියක් ... නිකන්ම පද පෙලක් නොවන්නට.

අතේ තියෙන ඇගිලි දහයම නව නව දෙතුන් පාරක් ගනන් කරලත් තව බරගානක් ගනන් කරන්න ඉතිරිවෙන තරම් බර භාශා ගනනක් තියෙන මේ ලෝකේ " ආදරය" කියන වචනයට මෙන්න මේකය ආදරය කියලා කියන්න පුලුවන් නියමාකාර අර්තකතනයක් දීලා තියේද ?

නැහැ නේද...

ආදරය කියන්නේ හැගීමක්,ඒ හැගීම කොයිවිදියට වරනගන්න පුලුවනිද කියන කාරනය කොයි තරම් සංකීරනද කියලා දැනෙන්නේ ආදරය කියන හැගීමත් එක්ක ,ලේසි පහසු නෙවේ දරුණු ගනයේ සටනක් කරන්නට සිද්ධ වුනාමය කියලා අහලා තිබ්බට මේ වන තෙක් එය අවබෝධ වී නොතිබිණි.

ජනේලයෙන් එලියේ චුරු චුරු ගගා වැටෙන වැහි බිංදු එකින් එක දිහා වෙන් වෙන්ම බැලීමක් කරලන්නට නොහැකිවුනත් හරියට ඒ ආකාර වූ බැල්මක් එක්කලා එළිය බලාගෙන කල්පනා කරන්නට වූයේ

ඔය ආදරය ගැනමය.ඔය කල්පනාව අස්සේ පියවි ලෝකයට ආවනම් ඒ ටික වේලාවකට ඉස්සෙල්ලා අම්මා ගෙනවිත් දුන්න තේ කෝප්පයේ රස්නය අතට දැනුනාමය,එහෙම වෙලාවක පොත් මේසේ පැත්තකින් තිබුන පුංචි කොලකෑල්ලකට ඇස් ගියේ අහම්බයකට වගේ...

ප්‍රේමයක් නොවුනත්

"රුවනි"ගේ

හිත ලගදී ලබපු සතුට

සතුටක් නැතත්

"පවනි"ගේ

හිත ලගදී

ප්‍රේමයක්

හොයන කොට

දවසක්දා

හිතට ලංවුන

නුඹගේ

හිත ලග

ප්‍රේමයත්

සතුටත්

හොයමින්

වෙහෙසෙනවා.

අහම්බයකට වගේ ඇස් ගිය කොල කෑල්ලේ ලියවිලා තිබුන මේ පද පේලිය දැක්කමයි හිතුනේ හිතමින් උන්න ආදරයේ සංකීරන අවස්තාව මීට ඉහතදී කොතැනක හෝ මට හමුවී ඇති බව.(හරි හැටි මතකයක් නැති වුනාට අනිවාර්‍යෙන්ම ඔය කාගෙහරි හොටුපෙරාගෙන අඩන ලව් ස්ටෝරි එකක් ඇහැව්වට පස්සේ ලියවිච්ච එකක් වෙන්ට ඇති.)

කොහොමින් කොහොමහරි ආදරය කියන්නේ හැගීමක් බව අපි හැමෝම දන්නවනේ, ඉතින් හැගීමකට පුලුවනි නේ විවිධාකර වූ ස්වරූප වල සිටින්න.සතුට,දුක, කේන්තිය ආදි වෙනත් ඕනෑම හැගීමක් වාගේ ආදරයෙත් විවිධ වූ ස්වරූප ගන්නවා.(ඒවා එකින් එකට කතාකරන්නට ගියහොත් වෙනම ම කතාවක් වෙනවා)

මොක උනත් මේ කතාව පටන් ගන්නකොට අර මුලින් කියපු ආදරය වරනගන එක අසීරූ කාරනයක් ය කියන එක පැනනැගෙන්නේ පිටතින් එකිනෙකට සමානව පේන ආදරයේ ස්වරූප කිහිපයක් එකම හිතක ඇති උනාමයි,ඔතනදී තමා අර කිව්ව ද්වන්ද සටන කරන්නට සිද්ධවන්නේ.

සරලව කිව්වොත් එකම හිතක දෙන්නෙක් ඉන්නවා වගේ වැඩක්.

දැන් තේරෙනවා නේද...

දැන් මොකද කරන්නේ,

එකම හැගීමක් ස්වරූප දෙකක්,

මෙතනදී තමා තෝරාගැනීම කියන සාධකය මේකට මැදිහත් වෙන්නේ.

ඔන්න ඔය තෝරාගැනීමේ සාධකය බර වෙන පැත්තේ හැටියට තමා

අහම්බෙන් වගේ ඇස් ගිය,මේසේ කොනක තිබිලා හම්බවුන පදපේලියේ ලියවිලා තියෙන කතන්දරය අහන්නට වෙන්නේ...

ඉතින්,

සමාවන්න ඕන මේ විදියට දිග හෑල්ලක් ලියාගෙන යන්න සිද්ධ වුනාට හිතට දැනුන දේ...

ජයවේවා.

සුමියා

ආදරනීය නොවැම්බරය...Sweet_November(2001)

සොයා යම්ද ආදරනීය නොවැම්බරයක් ....

මහලොකුවට චිත්‍රපට ගැන දන්නා නිසානම් නොව,හදවතට දැනෙනා නිසා සටහන් කරන් යමි.

චිත්‍රපටය                           - Sweet_November(2001)

අධ්‍යක්ශනය                     - Pat O'Connor

රංගනය                            -  Keanu Reeves, Charlize Theron

IMDB_6.7

තමන්ට ගැලපෙන ජීවිතය තියෙන්නේ තමන් තුලම බවත් 

එය සෙවිය යුත්තේ අන් අයගේ බලාපොරොත්තුවීම් මත නොවන බවත්,

ජීවිතය සොයා යෑම යනු තමන් තුල ම සැගවුන ජීවිතය සොයා යැම බවත් සේම ,

ජීවිත ගමනේ සියල්ල රදා පවතින්නේ ලං කරගැනීම මත නොවන්නේය,

විටෙක අත් හැරීමද,

මතකයන්ගේ ස්භාවය ද 

ජීවිත ගමන තීරණය කරනු ඇති බවත් 

කියන්නට උත්සහ දරනු ලැබේ.Sweet_November.

චිත්‍රපටය අවසානයේ සාරා සහ නෙල්සන් අතර වූ අහන්න ලැබුන හිතට වදින සංවාදය.

(මට හිතෙන විදියට සමස්ත චිත්‍රපටයේම සංක්ශිප්තය මේ තුල අඩංගුයි)

Sweet_November,

"සාරා: නෙල්සන්,ඔයා දැන් මෙතනින් ගියොත්, අපි දෙන්නගෙ මතකය හැමදාටම සතුටුදායක මතකයක් වෙයි.

නෙල්සන්: සාරා, ජීවිතය කියන්නෙ සතුටම විතරක් නෙවෙයි.

සාරා: ඔයා මාව මතක තියාගන්නෙ කොහොමද කියන එක විතරයි මට වැදගත්

මට ඕන ඒ මතකය ගොඩක් ශක්තිමත් ලස්සන මතකයක් කරන්න.

ඔයාට පේන්නෙ නැද්ද?

ඔයා ඒ විදිහට මාව මතක තියාගත්තොත්, මට පුලුවන් ඕන දේකට සතුටෙන් මුහුණ දෙන්න.

ඕනම දේකට.

නෙල්සන්, ඔයා තමා මගේ සදාකාලික බව"

ඉල්ලීම.

මේ දවස් වල කුනු හරි ප්‍රසිද්ධයි නේ....

  "කුනු"

          පහුගිය දවස් ටිකේ අනේ ඉතින්  මේ තරම් කතාබහ උන මාතෘකාවක් තවත් මේ සිරි ලංකාවේ නොතිබුන තරම්,මාධ්‍යය ආයතන වලින් පටන් ගත්තම,සමාජ ජාල වෙබ් අඩවි පුරවගෙන ආපු ඔය කුනු කතා ටික කඩේ පිලේ විතරක් නෙවෙයි  කන්තෝරුවේ පවා හරි ජයට කතා උන මතෘකාව බවට පත් උනා.ඔය කතා ඔක්කෝම එලියට එන්න ගත්තේ පහුගිය දිනයක සිදුවූ අතිශය අවසානාවන්ත,මිනිසා විසින් ම ඇති කරගත්තා වූ විනාශයක ප්‍රතිඵලයක් බවට පත් වූ කාරනාවක් නිසාය.එනම් කොළඹ නගරයට තදාසන්න කොලොන්නාව මීතොටමුල්ල කුනු කන්ද නාය යෑම පසුබිම් කොටගෙනය.එතැන් පටන් කුනු ගැන සිදුවුනා වූ කතාවන් අපමනය,ඒ අස්සේ කුනු ගැනම ,කුනු දේශපාලනයේ එලියට ඇදී ආ කුනු කාරනාවන්ද බොහෝය.එහෙයින් කාලෙකට පස්සේ හමුවුන හොද රස කතාවක් වගේ කුනු කන්දේ කතාව,කුනු කන්ද නිසා උපන් ශෝකය පහුගිය දින කිහිපයේ හැමෝම අතර හොදම ටේස්ට් එකෙන් සද්දෙට හැපුනේය.අද දවස වෙනකොට ඒ හැම කුනු කතාවක්ම,කොයි තරම් හොදට බුබුලු දමා නටමින් පැහෙන තෙල් තාච්චියක් වුව ටිකකින් සන්සුන් වන්නා සේම නිහඩ වී අවසන්ය.දැන් ඉතින් මේ සූදානම ඒ කුනු කතා වල නිහඩතාවය අස්සේ තවත් කුනු කතාවක් ගැන පොඩියට සටහන් කරගෙන යන්නය  කියලා.(බොහෝ දෙනෙක්ට අනුවනම් මේකත් ඉතින් කුනු වැඩක් බවට පත්වේවි .)

මේ දවස්වල ඉතින් සමාජ ජාල වෙබ් අඩවි පැත්තේ දකින්න තියෙන කාරනාවන් එක්ක තමා මේ කුනු කතාව එලියට එන්නේ. ශ්‍රී පාදය පවිත්‍ර කිරීමේ වැඩසටහන් ආදී නම් වලින් සංවිධානය වන විවිද වූ වැඩසටහන් රාශියක් දක්නට ලැබීම මේ කුනු පිලිබද සටහන ලියන්නට මග පාදන්නට විය.කාරනය මෙවන් වැඩසටහන් සංවිධානය වීම පිලිබදව නොවන්නේය,(මෙවන් දෑහි නිරතවන,සංවිධානය කරන සියල්ල හට නොඅඩුව සමන්  දෙව් පිහිට නම් ලැබෙන්නේය.)මෙවන් වැඩසටහන් සංවිධානය වීමට අවැසි පසුබිම  නිර්මානය වීමේ හේතු කාරනාවන්ය. දැන් ඔබට වැටහෙනවා ඇති මේ කතාකරන්නට යන කුනු කාරනය කුමක්ද කියා,ඒ වෙනෙකක් නොව "ශ්‍රී පාදස්ථානයේ"කුනු සම්බන්ධව වේ.ශ්‍රී පාදස්ථානය වන්දනා කරන බහුතරය බෞද්ධයන් වන නිසාම මේ කුනු කාරනයේ වැඩි බරට කරගහන්නට  බෞද්ධයන්ට සිදු වුවද,මේ කුනු කතාවට ශ්‍රී පාද වන්දනා කරුවන් සියල්ලෝම වගකිව යුතු වේ.

කාර්යාලය තුල කතාවකදී අසන්නට ලැබුනු සැටියට මෙවර ශ්‍රී පාද සමයේ පමනක් ප්ලාස්ටික් බොතල් මිලියනකට අධික ප්‍රමානයක් සමනල කන්ද අඩවියේ පමනක් තිබී හමු වී ඇත.මුලු රටටම දිය සපයන ප්‍රධාන ගංගාවන් හි උපත ශ්‍රී පාද අඩවිය යන්න නොදන්නා මිනිසුන්ට නම් මෙහි බරක් පතලක් නොතේරෙනු ඇත.මාස හයක ශ්‍රී පාද සමයෙන් පසුව සංවිධානය වී වෙනම ඉවත් කල යුතු තරමට ශ්‍රී පාදස්ථානයේ කුනු එකතු වීම පිලිබදව සියලුම ශ්‍රී පාද වන්දනා කරුවන් අතිශය ලැජ්ජාවට පත්විය යුතුය.ප්ලාස්ටික් බෝතල,පොලිතින් උර ආදියේ පටන් සෑම වර්ගයකම අපද්‍රව්‍යය මේ වන විට ශ්‍රී පාදය ගිලගෙන අවසන්ය.කොටින්ම කියතොත් ශ්‍රී පද රක්ශිතයේ තිබෙන ගස් වැල් වලට වඩා ප්‍රමානයකට අපද්‍රව්‍යය ජාතින් ශ්‍රී පාද රක්ශිතයේ ඇත.ශ්‍රී පාද ගමන් කරනවිට දෙපස බලනා විට පෙනෙන්නට තිබෙන සෑම ගසක් මුලම අඩුම ගානේ ටොපි කොලයක්වත් ඇත.ඒ තරමට අපද්‍රව්‍යය පරිසයට එක් වී අවසානය ...  සමාවන්න එක් වී නොව අප විසින් එක් කර අවසන්ය.(https://www.google.com/search?q=garbage+in+adams+peak&newwindow=1&client=opera&hs=aix&source=lnms&tbm=isch&sa=X&ved=0ahUKEwjN64qvpfTTAhVJ0xoKHRIvCVcQ_AUICigB#imgrc=K5cTlW8vMzFlHM:  ගිහින් බලන්න තියෙන අපද්‍රව්‍ය වල තරම...)

හදපිරි බැතියෙන් සිරි පතුල වන්දනා කරන්නට යෑම වරදක් නොව,නමුදු වන්දනා කරනා සිරිපතුල දායාද කල බුදුන් වහන්සේ දේශනා කල දර්ශනයේ පරිසරයට දුන් තැන වටහා නොගෙන කකුල් කඩිත්තුව සෑදෙනකන් පයින් ඇවිද,සිරිපතුලට වැද ආවාට නම් සතපහක වැඩක් නැත. ඊට වඩා හොදය ගූගල් එකෙන් ශ්‍රී පාදය සොයාගෙන ගෙදර ඉදන් වන්දනා කරන එක.තමන්ගේ ගෙදර මුලුතැන් ගෙයි අපද්‍රව්‍යය ටික එක දවසක් ඉවත් කරගත නොහැකිව ඊට පසුදින නහය වසාගෙන අපද්‍රව්‍යය ඉවත් කරන්නවුන්ගේ අම්මා මුත්තා මතක් කරන්නේ අපේ ඈයෝන්මය.එහෙව් ඈයෝම ශ්‍රී පාද රක්ශිතයට එක් කොට ඇති අපද්‍රව්‍යය ප්‍රමානය දුටු විට,අපටද සිදුවන්නේ පව් පිරුනා වුවද ඒ ඈයොන්ගේ අම්මා මුත්තා මතක් කරන්නටය. ශ්‍රී පාදය කරුනා කරන්නේ බෞදයන්ද , අන්‍ය ආගමිකයන්ද යන්න නොව සිතිය යුත්තේ මනුශ්‍යයන්ද ? තිරිසනුන්ද? යන්නය,මන්ද යත් ශ්‍රී පාද රක්ශිතයේ දකින්නට ලැබෙන අපද්‍රව්‍යය දුටු විට ඒ පිලිබද සිතන්නට වන නිසාය,පිරිමි යට ඇදුම් ද ,ගැහුනු යට ඇදුම් ද වන අතර ,ඒ මදිවාට කියන්නට ලැජ්ජය කාන්තාවන් සනීපාරක්ශාව සදහා භාවිතා කරන දෑ ද ඒ අතර වේ.ඒ විතරක් නම් කම් නැත සීතල දිය දහර ගෙන ගතට සිසිල දෙමින ගලා යන සීත ගගුල වෙත පියමනින විට ගං ඉවුර  පුරා ඇති දුම් වැටි වල අවශේෂ කොටස් දකින විට ,සිසිල් දිය දහරේ පහස විදීම කෙසේ වෙතත් ඇති තරම් අප්පිරියාවක් ගත වෙලාගන්නේය.

කොතෙක් කතා කලද දැන් අපද්‍රව්‍යය ශ්‍රී පාද රක්ශිතයට එක්කොට අවසන්ය.එහෙයින් මෙවරද ශ්‍රී පාදය පවිත්‍ර කිරීමේ වැඩසටහන් හි සහය පතන්නට සුමන් සමන් දෙවියන්ට සිද්ධ වනු ඇත.කෙතරම් පවිත්‍ර කිරීමේ වැඩසටහන් දියත් වුවද සියලු අපද්‍රව්‍යය ඉවත් නොවේ ,20% ක් පමන අපද්‍රව්‍යය ප්‍රමානයක් වැස්සෙන් ,සුලගෙන් රක්ශිතයේ ගැඹුරටම විහිද යන්නේය.අවුරුදු ගනනාවක් තිස්සේ මේ විනාශය රිසි සේ සිදුවූ නිසා මේ වන රක්ශිතයට සිදුව ඇති හානිය කෙතරම්දැයි සිතාගත හැකිද?ලෝක සිතියමේ Adam's peak යන්න ඉවත් කර ශ්‍රී පාදය යන්න සලකුනු කරන්නට වෙර දැරුවද,මේ විනාශකාරි ක්‍රියාවලිය නොනැවැත්තුවේ නම් අනාගත ලෝක සිතියමේ ශ්‍රී පාදය ලෙස සලකුනු වනු ඇත්තේ පසුගිය දිනෙක කඩා වැටුනා වූ මීතොටමුල්ල කුනු කන්දේ ස්වරූපයම ගත් ස්ථානයකි.එසේ වුවහොත් ඒ තරම් ලැජ්ජාවක් නම් කිසිදිනෙක බෞද්දයකු වශයෙන් අත්විදින්නට නොලැබෙනු ඇත.ඒ ලැජාවේ තරමට අනිවාර්යෙන් සුමන සමන් දෙවියන් සමනල අඩවියෙන් පමනක් නොව,ලංකාද්වීපයෙන්ම චුත වනු ඇත.එසේ වනු තුරු බලාසිටීම හෝ කලයුතු හරිදේ කිරීම ඔබ සතුය.

මගේ ප්‍රාර්තනයනම් මෙවන් විනාශයන් කරන්නවුන්ට ශ්‍රී පාදය කරුනා කරන්නට අවස්තාවක් නොලැබේවා යන්නයි(එතකොට එක් අතෙකින් ඔහේ ආතල් එකට වන්දනා කරන වුන් අඩු වී නිදහසේ ශ්‍රී පාදය වන්දනා කිරීමේ අවස්තාව වත් උදාවනු ඇත.)

ජයවේවා.

සුමියා

රසය - සුවය 😊

නුඹ ඔහූට දුන් 

හාදුවේත් 

මා නුඹට දුන් 

හාදුවේත් 

රසය 

වෙනස් බව දනිමි 

නුඹ මට නොදුන් 

මා ඇයගෙන් පැතූ

 සුවය
එකක්ම බව දනිමි .

                                                                                                  සුමියා.

හිට්ලර් ,ජාතිවාදය සහ පව...

"එය ඕනෑම මිනිත්තුවක්දී නැවත වරක් සිදුවීමේ හැකියාවක් පවතී"

                                                                    (කාල් යේපර්ස්)

මෑතකදී නරඹපු විශිෂ්ඨ සිනමා කෘතියක් , එනයින් ගොඩනැගුනා වූ ගැටලුවක් , නොසිතූ ලෙසක හමුවූ ඒ කී ගැටලුවට හරියාකාරම පිලිතුර ලබාදෙන විශිෂ්ඨ කෘතියක් නිමිති කොටගෙන මෙලෙසින් සටහන් කරන්නට සිතුවෙමි. චිත්‍රපටය schindler's List http://www.imdb.com/title/tt0108052/ නම් වන අතර එහි කතා පුවත වන්නේ නට්සී ජර්මානුවන් විසින් පෝලන්තය ආක්‍රමනය සහ ඉන් පසුව සිදුවන්නා වූ මෙතෙකැයි කියා ගනනය කල නොහැකි අතිශය ශෝකාන්ත සිදුවීම් පෙලක් මධ්‍යයෙහි මතුවන්නා වූ මානුශීය පැතිකඩ වුවද හදවත පසාරු කරගෙන යන තරමේ බලපෑමක් කරනුයේ එකී ප්‍රකාශනය නොව එවන් ප්‍රකාශනයකට මග පෑදුවා වූ පෝලන්ත යුදෙව් ජනතාවගේ නොහිලිය හැකි තරමේ විදවීම් සමූහය වේ.  https://en.wikipedia.org/wiki/Auschwitz_concentration_camp ඒ සියල්ල හදවත පසාරු කරගෙන යන මොහොතේ හදවත නගන ප්‍රශ්නයනම් "හිට්ලර් මේ තරමට ම යුදෙව්වන් සමග වෛර බදින්නට හේතුවූයේ කුමක්ද යන්නයි"සිත තුල ප්‍රබල කැලඹීමක් ඇති කරන්නට සමත් මේ ප්‍රශ්නයට පිලිතුර සොයමින් සිටිනා වේලාවක හමු වූ විශිෂ්ඨ කෘතියක් ඕනෑවටත් වඩා වැඩියෙන් මේ කරදරකාරි,හදවත කැලඹූ ප්‍රශ්නයට පිලිතුර සපයන්නට විය.එම කෘතිය නම් The Nazis: A Warning from History හි සිංහල පරිවර්තනයයි. https://en.wikipedia.org/wiki/The_Nazis:_A_Warning_from_History  BBC ආයතනයේ පරික්ශනාත්මක වාර්තා චිත්‍රපටයක මුද්‍රිත පිටපත ලෙස ලියැවෙන මෙය අදටත් ලොව කම්පා කල සාමාන්‍යය භාවිතයේදී කියැවෙන පරිදි හිට්ලර්ගේ යුදෙව් සංහාරයේ පසුබිම් කතාව කියාදේ. මේ හරහා චිත්‍රපටය නැරඹුවාට පසුව පැනනැගුන ප්‍රශ්නයට පිලිතුර සොයන්නට ගොසින් ඊටත් වඩා වැඩියෙන් හදවත පසාරු කරනා අත්දැකීම් සමූයකට මනසට මුහුන දෙන්නට සිදුවිය.

කෙසේ වුවද මේ සියලු ශෝකාන්තයන් මැදින් සියලු පසුබිම් කතාවන් මැදින් කෘතිය අවසානය තෙක් ආ විට හිට්ලර් නම් පුද්ගලයා පිලිබද තිබූ "හිට්ලර් පොරක්ය" යන සිතිවිල්ල (යම්කිසි කෙනෙකුට එකී ආකල්පය වැරද්දක් විදියට පෙනෙන්න්ට පුළුවනි) බිදීගියේ පුදුම සැහැල්ලුවකිනි. මානව ඉතිහාසයේ මෙතෙක් බිහිවූ කුරිරුම පුද්ගලයන් අතර වඩාත් ම කතාබහට පත් වූ චරිතය වන්නේ හිට්ලර්ය,දෙවන ලෝක යුද්ධයේ ජර්මානු නට්සීන්ගේ අසහාය නායකයාය යන පුද්ගල ස්වරූපයෙන් ලෝකයා ඉදිරියේ පෙනෙන්නට තිබෙන හිට්ලර් චරිතය තවදුරටත් එසේ නොවන බව එකහෙලාම නොවුනත් "නට්සීන්ගේ කතාව"තුලින් පුපුරවා හරී.මන්ද යත් හිට්ලර් නම් අසහාය නායක ප්‍රතිරූපයට යටින් සිටි,සෙවනේ සිටි සමහර නට්සි නායකයන් හිට්ලර්ටත් වඩා කුරිරු වූත්,සාහසික වූ බව අත්විදින්නට මේ කෘතිය හරහා හැකිවනු ඇත.(ඒ කෙසේද යත් එකින් එක කියන්නට නම් මට මුලු කෘතියම උපටා දකවන්නට සිදුවනු ඇත ,ඒ නිසා මාගේ නිර්දේශය නම් කෘතිය සොයාගෙන කියවන්නැයි කියාය)

ලෝකයේ මෙතෙක් බිහිවූ කුරිරුම පුද්ගලයන්ගෙන් එක් අයෙකු වු හිට්ලර් පොරක් යැයි මගේ හිත විශ්වාස ගෙන සිටියේ ,දෙවන ලෝක යුද්ධය  හා යුදෙව් සංහාරයේ සෘජු ආඥදායකයා හිට්ලර් යැයි අසාතිබූ නිසාය(තනි මිනිසෙක් මෙතරම් දෙයක් කලේය යන මතය ඒ සදහා බලපෑවේය) නමුදු ඒ සියල්ල බිදහෙලූ ,පුපුරවා දැමූ කෘතිය හරහා අවබෝධ කොටගත් ,උගෙනගත් දෙයක් වේනම් ඒ ලිපිය ආරම්භයේ සදහන්කොට ඇති කාල් යේපර්ස්ගේ 

"එය ඕනෑම මිනිත්තුවක්දී නැවත වරක් සිදුවීමේ හැකියාවක් පවතී" නම් වූ සර්වකාලීන සදාරනත්වයක් උසුලන ප්‍රකාශනයේ සත්‍යය තාවය වේ .එය අදාල වනුයේ තවත් හිට්ලර් කෙනෙක් ,තවත් නට්සින් බිහිවීමක්  සදහා පමනක් නොව තවත් අඩු වැඩි වශයෙන් තවත් හිට්ලර් ආකෘතීන් බිහිවීමේ හැකියාව සදහාය. ජාතිවාදය බිහිවන්නේ එහි මුල් පුරුක ලෙසය යන්න අවබෝධ කොටගන්නට නට්සීන් ගේ කතාව හොදම උදාහරනය වේ .සෘජුව ම නොවුනත් ඒ සදහා එක් වන පුංචිම පුංචි වචනයක දායකත්වය වුව සෑහෙන බව නට්සීන්ගේ කතාව අපට කියාදේ.තමන්ගේ ජාතියට ආදරය කිරීම සහ ජාතිවාදය අතර වෙනස පවතින්නේ කොතනදැයි නිර්නය කිරීම හරි පරිස්සමට කල යුතු වන්නේ ඒ නිසාය.ජාතිවාදය උඩු දිවූ පසු එහි ප්‍රහාරක අවි බවට පත්වන්නේ පොදු සාමාජීය කාරනාවන්ය .අධ්‍යාපනය ,සෞඛ්‍යය , රැකියා ආදි පොදු සාමාජීය කාරනාවන් මෙන්ම ,ඒ සියල්ලෙහි ලොකු අයියා යැයි විශ්වාස කරවා ඇති ප්‍රජාතාන්ත්‍රික දේශපාලනය ජාතිවාදයේ බරම ප්‍රහාරක අවිය බවට පත්වන්නේය . ඒ නිසාවෙන් දේශපාලනයත් ජාතිවාදයත් එකට එක්කාසු කිරීම පවක් බවට මා විශ්වාස කරමි. (ඒ සදහා දෙවන ලෝක යුද්ධය විසින් ලොවට අහිමි කල ජීවිත ගනන මතක් කරගන්න). ඉතින් ඒ නිසාවෙන් ජාතිවාදි පිපාසයට පැන් ඉසින්නට පෙර පව් කාරයෙක් වන්නට ඔබේ හිත එකගදැයි සිතාබැලීම වටී.

හිට්ලර් බිහිවූයේ ජාතිවාදි පදනමක් මතය .යුදෙව්වන් සමූල ඝාතනය වූයේ එහි අතිශය ශෝකාන්ත ප්‍රතිපලය ලෙසිනි .හිට්ලර් බලයට ගෙන ආ ජාතිවාදි බීජය වැපිරූ සහ ඊට පැන් ඉසි සෑම සියලු  දෙනාම ඒ වෙනුවෙන් සම වගකීමක් බාරගත යුතුවන්නේ ඒ නිසාවෙනි.හිට්ලර් සහ දෙවන ලෝක යුද්ධය ලෝක දේශපාලනික කාරනයක් වුවත් ඒ හරහා තනි තනි රාජ්‍යයන්  කෙරෙහි උගන්වන පාඩම ලාංකික දේශපාලනය කෙරෙහිද බලපාන ආකාරය තව වසර කිහිපයකින් අත්විදින්නට  ලැබෙන සලකුනු පෙනෙන්ට තිබෙන්නේ අවාසනාවකටය . එකී අවාසනාවට කරගහන්නේද,නැතිනම් එයින් මිදෙන්නේද යන්න තීරනය ඔබ අතේය .

ජයවේවා.

සුමියා.